Paralajmërim i rëndësishëm për të gjithë ata që udhëtojnë në Serbi

Është bërë publik një njoftim me rëndësi për të gjithë qytetarët që planifikojnë të udhëtojnë drejt Serbisë ose ta kalojnë atë në tranzit.

Sipas një paralajmërimi të publikuar nga avokati Arianit Koci, autoritetet serbe mund t’i kushtojnë vëmendje aktivitetit të mëparshëm të udhëtarëve në internet, përfshirë komentet dhe publikimet në rrjetet sociale, forumet apo platformat e tjera publike.

Nëse përmbajtje të tilla vlerësohen si fyese, kërcënuese ose interpretohen si nxitje e urrejtjes, ato mund të jenë objekt shqyrtimi nga institucionet kompetente në Serbi.

Sipas njoftimit, në raste të caktuara, personat që hyjnë në territorin serb mund t’i nënshtrohen kontrolleve shtesë kufitare, intervistimit nga autoritetet ose procedurave të tjera, nëse ekziston bazë ligjore sipas legjislacionit të vendit.

Paralajmërimi synon të informojë qytetarët që udhëtojnë drejt ose përmes Serbisë, duke i këshilluar të tregojnë kujdes për përmbajtjet që kanë publikuar më herët në internet dhe për gjurmën e tyre digjitale.

Njoftimi fillestar është shpërndarë nga avokati Arianit Koci.