Jola Hysaj ka reaguar publikisht pasi u emërua në krye të Agjencisë Kombëtare të Turizmit (AKT), duke sqaruar qëndrimin e saj përmes një postimi në rrjetet sociale.
Ish-kandidatja për deputete e Partisë Demokratike konfirmoi se ka pranuar detyrën e re dhe se, përpara emërimit, është takuar me kryeministrin Edi Rama. Sipas saj, gjatë bisedës, Rama i ka theksuar se synimi nuk është ta bëjë pjesë të Partisë Socialiste, por të kontribuojë në zhvillimin e institucionit që do të drejtojë.
Hysaj shprehet se mbetet demokrate, por nuk është më pjesë e Partisë Demokratike, duke shtuar se angazhimi i saj i ri lidhet me zhvillimin e turizmit shqiptar dhe jo me përkatësinë politike.
Ajo u bëri thirrje qytetarëve të respektojnë vendimin e saj, duke theksuar se secili është i lirë të ketë mendimin e vet, ndërsa nënvizoi se është e përqendruar te përgjegjësia e re dhe synon të justifikojë besimin e dhënë.
Sipas Hysajt, puna dhe rezultatet do të jenë përgjigjja më e mirë ndaj çdo komenti apo spekulimi që mund të qarkullojë në opinionin publik.
Be First to Comment