Ish-Presidenti Ilir Meta ka reaguar në rrjetet sociale pas lajmeve për heqjen e sanksionit “non grata” ndaj kryetarit të Partisë Demokratike, Sali Berisha. Në reagimin e tij, Meta e konsideron vendimin e marrë vite më parë nga Departamenti Amerikan i Shtetit si pjesë të një skenari të qëllimshëm kundër opozitës shqiptare.
Kreu i Partisë së Lirisë theksoi se qëndrimet e mbajtura prej tij pesë vite më parë, në cilësinë e Presidentit të Republikës, sipas tij janë vërtetuar nga zhvillimet e mëvonshme. Meta deklaron se paralajmërimet e tij kishin të bënin me një përpjekje për të dëmtuar pluralizmin politik në vend dhe për të cenuar marrëdhëniet mes Shqipërisë dhe Shteteve të Bashkuara të Amerikës.
Në vijim të reagimit, ai e lidhi çështjen e vitit 2021 me atë që njihet si “Afera McGonigal”, duke pretenduar se zhvillimet e mëvonshme kanë nxjerrë në pah mënyrën se si, sipas tij, janë përdorur ndikime dhe financime për të goditur opozitën shqiptare dhe për të ndikuar në proceset demokratike të vendit.