Lista e zezë në TIMS për protestuesit e dhunshëm? Propozimi që po shqyrton qeveria
Personat e identifikuar si të përfshirë në akte dhune gjatë protestave në Shqipëri mund të përfshihen në një listë të posaçme në sistemin TIMS, me synimin për t’u kufizuar hyrja në vendet e Bashkimit Europian.
Sipas burimeve të brendshme të “Top Channel”, nga grupi i punës që po harton paketën pranë Kryeministrisë, propozimi parashikon identifikimin e personave të përfshirë në incidente të dhunshme dhe regjistrimin e të dhënave të tyre në sistem.
Nisma lidhet me paketën e masave të paralajmëruar nga kryeministri Edi Rama të hënën. Grupi i punës po shqyrton mënyrat se si do të trajtohen rastet e dhunës së regjistruar gjatë protestave.
Sipas të njëjtave burime, synimi i propozimit do të ishte kufizimi i hyrjes në vendet e BE-së për personat e identifikuar. Megjithatë, bëhet fjalë për një masë të raportuar si propozim në shqyrtim dhe jo për një vendim të konfirmuar si të miratuar.
