Qeveria miraton ndryshime në Buxhetin 2026, rriten fondet për shëndetësinë, fëmijët me aftësi të kufizuara dhe mbrojtjen

Këshilli i Ministrave ka miratuar një akt normativ për ndryshime në Buxhetin e Shtetit për vitin 2026, duke parashikuar rritje të financimeve në disa sektorë të rëndësishëm.

Ministri i Financave, Petrit Malaj, bëri të ditur se masat e reja përfshijnë rritjen e mbështetjes për fëmijët me aftësi të kufizuara, financime shtesë për shëndetësinë, si dhe fonde për punonjësit e urgjencës dhe shërbimit zjarrfikës.

Sipas Malajt, pagesa për fëmijët me aftësi të kufizuara do të dyfishohet, me një fond shtesë prej 750 milionë lekësh. Nga kjo masë pritet të përfitojnë rreth 1720 fëmijë dhe zbatimi do të nisë nga 1 korriku 2026.

Gjithashtu, qeveria ka parashikuar mbështetje edhe për kujdestarët e personave me aftësi të kufizuara, duke marrë përsipër mbulimin e kontributeve të sigurimeve shëndetësore dhe shoqërore, me një efekt financiar rreth 2 miliardë lekë.

Në sektorin e shëndetësisë janë parashikuar 1.5 miliardë lekë fonde shtesë për barnat onkologjike në spitalet publike. Sipas ministrit, ky financim synon të përmirësojë aksesin e pacientëve në trajtime të nevojshme.

Një tjetër masë është rritja e pagave për mjekët dhe personelin e shërbimit të urgjencës mjekësore, ndërsa do të akordohet fond shtesë edhe për pagesën e orëve të punës shtesë për rreth 1250 punonjës të shërbimit zjarrfikës.

Pjesë e ndryshimeve janë edhe fondet shtesë për sektorin e mbrojtjes. Qeveria do të alokojë 10.3 miliardë lekë shtesë për të garantuar që buxheti i mbrojtjes të arrijë nivelin 2.6% të Prodhimit të Brendshëm Bruto, në përputhje me angazhimet ndaj NATO-s.

Po ashtu, është vendosur rritja e garancisë sovrane nga 3 miliardë lekë në 5 miliardë lekë, duke zgjeruar edhe fushat që do të mbështeten përmes kësaj skeme financimi.