Kryeministri Edi Rama ka mbrojtur përfshirjen e arkitektëve të huaj në projektet e zhvillimit urban në Shqipëri, duke hedhur poshtë kritikat se ndërhyrje të tilla bëhen jashtë standardeve apo në dëm të pronarëve dhe banorëve.
Rama deklaroi se në Shqipëri nuk ka pasur raste kur qytetarët janë nxjerrë me forcë nga banesat e tyre për t’i hapur rrugë një investimi privat. Sipas tij, pronarëve nuk u është mohuar as e drejta për të vendosur nëse dëshirojnë apo jo të zhvillojnë pronën e tyre.
Kryeministri vlerësoi gjithashtu bashkëpunimin me arkitektë të njohur ndërkombëtarë, duke theksuar se kjo u krijon profesionistëve të rinj shqiptarë mundësinë të punojnë drejtpërdrejt me emra të rëndësishëm të arkitekturës botërore.
Ai e përshkroi Shqipërinë dhe Tiranën si një “universitet të madh të hapur të arkitekturës në natyrë”, duke shprehur bindjen se në vitet e ardhshme arkitektët shqiptarë do të kenë mundësi të konkurrojnë edhe në tregjet ndërkombëtare.
Rama pranoi se Shqipëria ende nuk i disponon të gjitha kapacitetet dhe njohuritë e nevojshme për realizimin e projekteve komplekse, përfshirë ndërtimin e kullave. Megjithatë, sipas tij, bashkëpunimi me profesionistë të huaj po ndihmon në krijimin e bazave për një nivel të ri të arkitekturës shqiptare.
Duke iu përgjigjur kritikave për mënyrën se si zhvillohen projektet, Rama i cilësoi si të pavërteta pretendimet se njerëzit nxirren me forcë nga shtëpitë e tyre për t’i hapur rrugë investimeve private.
“Nuk ka ndodhur në Shqipëri asnjëherë që të nxirret dikush me forcë nga shtëpia për t’u zhvilluar një investim privat dhe asnjë privati nuk i është mohuar e drejta e tij për të zhvilluar apo jo një projekt”, u shpreh Rama.
Ai foli gjithashtu për rastet e zaptuesve që janë pjesë e proceseve të legalizimit, duke theksuar se edhe për këto situata ekziston një kuadër ligjor dhe se institucionet, sipas tij, nuk kanë mbajtur anën e pronarit apo të zhvilluesit.
Në lidhje me kritikat ndaj arkitektëve të huaj, Rama hodhi poshtë akuzat se ata vijnë në Shqipëri për të realizuar projekte jashtë standardeve, duke argumentuar se bashkëpunimi ndërkombëtar është pjesë e procesit të zhvillimit të arkitekturës dhe urbanistikës në vend.