Rikthehet i nxehti në Europë, temperaturat mund të arrijnë deri në 37°C
Shtatori nuk pritet të sjellë menjëherë freskinë tipike të vjeshtës në Europë. Meteorologët italianë paralajmërojnë mundësinë e rikthimit të temperaturave të larta, si pasojë e një vale të re të nxehti me origjinë afrikane.
Ditët e para të muajit mund të karakterizohen nga reshje shiu dhe stuhi të izoluara, kryesisht në zonat malore. Megjithatë, kjo situatë pritet të jetë e përkohshme, pasi nga e enjtja kushtet atmosferike mund të ndryshojnë dhe temperaturat të rriten ndjeshëm.
Sipas parashikimeve, mbi Itali dhe më pas edhe në pjesë të tjera të Europës mund të krijohen kushtet për formimin e një “kupole të nxehtësisë” (“Heat Dome”), fenomen që favorizon grumbullimin dhe qëndrimin e ajrit të nxehtë mbi një zonë.
Vala e nxehtësisë mund të prekë edhe Francën, Gjermaninë, Zvicrën dhe Austrinë. Gjatë fundjavës, anticikloni afrikan pritet të forcohet, duke sjellë temperatura mbi mesataren për këtë periudhë të vitit.
Në Romë, temperaturat mund të arrijnë 36-37°C, ndërsa edhe veriu i Italisë pritet të përballet me një rritje të ndjeshme të temperaturave.
Në Milano, termometri mund të shënojë rreth 36°C. Nëse kjo vlerë konfirmohet, do të ishte një temperaturë mjaft e pazakontë për muajin shtator dhe potencialisht pranë rekordeve historike të qytetit për këtë periudhë.
Megjithatë, temperaturat pritet të ulen gradualisht gjatë natës, ndërsa netët më të gjata të shtatorit mund të ndihmojnë në dobësimin e valës së nxehtësisë.
Meteorologët theksojnë se parashikimet afatmesme mund të ndryshojnë. Për këtë arsye, intensiteti dhe kohëzgjatja e valës së nxehtësisë do të bëhen më të qarta në ditët në vijim.