Një trend alarmues po shqetëson gjithnjë e më shumë ekspertët e shëndetësisë: vdekjet nga kanceri i rektumit tek të rinjtë po rriten me ritme shumë më të shpejta sesa ato nga kanceri i zorrës së trashë.
Sipas një studimi që pritet të prezantohet në konferencën prestigjioze “Digestive Disease Week 2026” në Çikago, normat e vdekshmërisë nga kjo sëmundje po rriten dy deri në tre herë më shpejt tek personat e moshës 20 deri në 44 vjeç.
Ekspertët paralajmërojnë se situata mund të përkeqësohet ndjeshëm deri në vitin 2035, sidomos për grupmoshat 35-44 vjeç, nëse nuk ndryshon mënyra e diagnostikimit dhe trajtimit të pacientëve të rinj.
Autorët e studimit theksojnë se kanceri kolorektal nuk është më vetëm një sëmundje e moshës së tretë. Sipas tyre, rastet tek të rinjtë po shtohen me shpejtësi dhe po diagnostikohen shpesh në faza të avancuara e më agresive.
Analiza u bazua në të dhënat e Qendrave Amerikane për Kontrollin dhe Parandalimin e Sëmundjeve (CDC) për periudhën 1999–2023, ndërsa inteligjenca artificiale u përdor për të parashikuar zhvillimin e rasteve në vitet e ardhshme.
Një nga shqetësimet kryesore mbetet vonesa në diagnostikim. Mjekët paralajmërojnë se shumë të rinj neglizhojnë simptomat ose diagnostikohen gabimisht me probleme më të lehta, si hemorroidet, duke humbur kohë të çmuar për trajtim.
Ekspertët bëjnë thirrje që simptomat paralajmëruese të mos injorohen. Shenjat më të zakonshme përfshijnë gjakderdhjen rektale, ndryshimet e vazhdueshme në jashtëqitje, dhimbjet abdominale, humbjen e pashpjegueshme të peshës dhe lodhjen e vazhdueshme.
Sipas studiuesve, nëse nuk ndërmerren masa të reja për depistim dhe ndërgjegjësim, numri i rasteve dhe vdekjeve tek të rinjtë mund të vazhdojë të rritet në mënyrë dramatike gjatë viteve të ardhshme.