Shkojnë të shohin varrin e gjyshes në Korçë, por në varrin e saj gjejnë dikë që i tr*nditi!

Një rast i pazakontë, i denjë për filmat fantastiko-shkencorë, është denoncuar mbrëmjen e djeshme në emisionin “Stop” në TV Klan.

Ngjarja vjen nga fshati Drenovë i Korçës, ku një familje ka përjetuar një situatë tronditëse. Shtetasi Piro Murcka tregon se më 4 shtator 2019, teksa kishte shkuar për të përkujtuar të atin, zbuloi se në varrin e stërgjyshes së tij ishte varrosur një person tjetër.

Sipas tij, stërgjyshja kishte rreth 50-60 vite që prehej në atë vend, ndërsa personi tjetër ishte varrosur vetëm dy muaj më parë.

“Kur shkuam për përvjetorin e babait, pamë që në varrin e stërgjyshes ishte varrosur dikush tjetër. Ai kishte vetëm dy muaj që kishte ndërruar jetë,” tregon Murcka.

Ai shton se familja e tij prej dekadash kishte ndezur qirinj në atë varr dhe nuk ka asnjë informacion se çfarë ka ndodhur me eshtrat e të afërmes së tyre.

Për të sqaruar situatën, ai iu drejtua fillimisht komunës dhe më pas kryeplakut të fshatit, por ky i fundit deklaroi se nuk kishte dijeni për rastin.

Sipas rregullave, për hapjen e një varri duhet të njoftohet kryeplaku, por ai thekson se askush nuk e kishte informuar.

Nga ana tjetër, administratori i njësisë administrative Drenovë shpjegoi se varrezat nuk kanë një menaxhim të mirëfilltë institucional dhe se përgjegjësia bie kryesisht mbi komunitetin dhe kryeplakun.

Rasti ka ngritur pikëpyetje të forta mbi mënyrën e menaxhimit të varrezave në zonat rurale dhe mungesën e një regjistri zyrtar për to, duke lënë hapësirë për situata të tilla të papranueshme.