Këtë të martë, më 26 maj, në Bruksel u mbajt Konferenca e 8-të Ndërqeveritare mes Shqipërisë dhe Bashkimit Europian, e cila shënon një hap të rëndësishëm drejt fazës përmbyllëse të negociatave për anëtarësim.
Në përfundim të takimit, Kryeministri Edi Rama doli në një konferencë për mediat së bashku me Komisioneren për Zgjerimin Marta Kos dhe zëvendësministren për Çështjet Europiane të Qipros, Marilena Raouna.
Gjatë fjalës së tij, Rama u shpreh në mënyrë simbolike për marrëdhënien e Shqipërisë me Bashkimin Europian, duke e krahasuar me një “dashuri që sjell edhe sfida”, por që sipas tij po jep rezultate konkrete në procesin e integrimit.
Ai theksoi se Shqipëria ka arritur të hapë grupkapitujt brenda një periudhe të shkurtër dhe tashmë po hyn në fazën e mbylljes së tyre, duke e cilësuar këtë si një hap të rëndësishëm përpara në rrugën drejt BE-së.
Nga ana tjetër, zëvendësministrja e Qipros vlerësoi progresin e Shqipërisë në procesin e anëtarësimit, duke theksuar se vendi ka përmbushur me sukses kushtet e ndërmjetme dhe se procesi po ecën në mënyrë të qëndrueshme.
Ajo shtoi se zgjerimi i Bashkimit Europian mbetet një prioritet strategjik dhe se reformat e ndërmarra nga Shqipëria janë të rëndësishme për ecurinë e mëtejshme të integrimit.