Qytetarë, aktivistë të mjedisit dhe përfaqësues të organizatave të shoqërisë civile u mblodhën këtë të diel përpara Ministrisë së Brendshme në Tiranë, për të protestuar kundër projekteve të planifikuara për zhvillim në zonën e Zvërnecit.
Tubimi u organizua pas incidenteve të ndodhura një ditë më parë në Zvërnec, ku protestuesit pretenduan se u përballën me dhunë nga punonjës të një kompanie private sigurie gjatë kundërshtimit të punimeve të parashikuara në zonë.
Me pankarta dhe thirrje në mbrojtje të mjedisit, pjesëmarrësit kërkuan ndalimin e ndërtimeve që, sipas tyre, rrezikojnë ekosistemet dhe vlerat natyrore të një prej zonave më të rëndësishme bregdetare të vendit. Mes sloganeve më të dëgjuara ishte edhe thirrja: “Shqipëria nuk shitet”.
Gjatë protestës, aktivisti Taulant Binaj u shpreh se vendi po përballet me një presion të vazhdueshëm ndaj zonave të mbrojtura natyrore, duke argumentuar se shumë prej tyre rrezikojnë të humbasin karakterin dhe vlerat e tyre për shkak të zhvillimeve të pakontrolluara.
Sipas tij, zona të njohura si Rrjolli, Kune-Vaini, Patoku, Karavastaja, Vjosa-Narta dhe Butrinti kanë nevojë për mbrojtje më të madhe dhe politika më të forta konservimi.
Binaj shtoi gjithashtu se ndryshimet ligjore të viteve të fundit kanë krijuar, sipas tij, hapësira për ndërhyrje në territore të mbrojtura, duke e konsideruar këtë një sfidë serioze për ruajtjen e trashëgimisë natyrore të Shqipërisë.
Protestuesit i bënë thirrje institucioneve shtetërore të rishikojnë projektet e planifikuara në Zvërnec, të garantojnë transparencë në vendimmarrje dhe të sigurojnë mbrojtjen e zonave me rëndësi të veçantë mjedisore, turistike dhe kulturore.