Aksi dytësor që lidh zonën nga Spitali Hygeia deri te Megatek, përgjatë autostradës Tiranë-Durrës, prej kohësh paraqet probleme në infrastrukturë dhe ka nevojë për rikonstruksion. Gjendja e tij është përkeqësuar edhe më shumë gjatë periudhës së fundit për shkak të rritjes së qarkullimit, si pasojë e punimeve në aksin kryesor Tiranë-Durrës.
Në segmente të ndryshme të kësaj rruge janë konstatuar dëmtime të asfaltit, ndërsa disa pjesë të infrastrukturës anësore kërkojnë rehabilitim. Megjithatë, sipas përshkrimeve teknike, rruga ruan parametrat kryesorë të lëvizjes dhe nuk kërkon ndërhyrje të thella strukturore.
Për të përmirësuar gjendjen e saj, Bashkia e Tiranës ka shpallur një projekt rikonstruksioni për këtë aks rrugor, me një fond limit prej rreth 595 milionë lekësh të reja, ose mbi 6 milionë euro.
Sipas dokumentacionit të tenderit, ndërhyrja parashikohet të realizohet në një segment me gjatësi afërsisht 6.8 kilometra. Bazuar në këtë vlerë, kostoja mesatare për kilometër rezulton afër 900 mijë euro, çka ka ngjallur diskutime mbi nivelin e investimit të planifikuar.
Dokumentet teknike të projektit evidentojnë se gjerësia aktuale e rrugës varion nga 6.5 deri në 7.2 metra dhe konsiderohet e mjaftueshme për qarkullimin normal të automjeteve në të dy drejtimet. Po ashtu, theksohet se trotuaret ekzistuese ofrojnë hapësirë të mjaftueshme për lëvizjen e këmbësorëve.
Këto të dhëna sugjerojnë se ndërhyrjet kryesore do të fokusohen te rehabilitimi i shtresave asfaltike dhe përmirësimi i elementëve ekzistues të infrastrukturës, pa pasur nevojë për zgjerime apo transformime të mëdha të aksit rrugor.
Projekti pritet të realizohet në muajt në vijim, ndërsa vëmendja mbetet te mënyra e zbatimit të investimit dhe efektiviteti i kostove të parashikuara për këtë segment rrugor.