Ish-mësuesja Rebecca Joynes përballet me përjashtim të përhershëm nga sistemi arsimor, pasi një panel profesional e shpalli fajtore për sjellje të papranueshme lidhur me abuzimin seksual ndaj dy nxënësve të mitur.
31-vjeçarja nuk ishte e pranishme në seancën disiplinore të zhvilluar nga Teaching Regulation Agency, ku u deklarua se veprimet e saj kishin shkaktuar pasoja të rënda tek të dy të rinjtë.
Aktualisht, Joynes po vuan një dënim prej gjashtë vitesh e gjysmë burg, pasi u dënua për disa vepra penale që lidhen me marrëdhënie seksuale me të mitur. Sipas autoriteteve, rastet përfshinin dy nxënës 15-vjeçarë, të cilët ajo i kishte njohur gjatë kohës që punonte në një shkollë në Greater Manchester.
Gjatë seancës u bë e ditur se ajo kishte krijuar marrëdhënie manipuluese me njërin prej nxënësve, duke i bërë dhurata dhe duke e çuar në banesën e saj në Salford, ku ndodhën edhe marrëdhëniet intime. Ndërkohë, lidhja me nxënësin e dytë nisi kur ajo ishte ende nën hetim për rastin e parë. Më vonë, ajo mbeti shtatzënë dhe solli në jetë një fëmijë.
Përfaqësuesja e agjencisë, Shirley Duckworth, e përshkroi sjelljen e saj si një shkelje serioze të besimit profesional, duke theksuar se Joynes kishte tentuar të fshinte materiale nga telefoni i saj sapo nisën hetimet policore.
Gjatë procesit gjyqësor, Joynes mohoi akuzat dhe pretendoi se kishte qenë në një lidhje dashurie me njërin prej djemve, por juria nuk i pranoi deklaratat e saj dhe e shpalli fajtore.