Shqipëria është gati për sfidat vendimtare të play-off-it që çojnë në Botërorin 2026, teksa më 26 mars kuqezinjtë do të përballen me Poloninë në Varshavë, në testin e parë drejt ëndrrës së madhe.
Trajneri i Kombëtares, Sylvinho, ka shpallur listën me 26 lojtarët e grumbulluar për këtë përballje, ku bien në sy rikthime të rëndësishme, mungesa të detyruara dhe disa emra të rinj që kërkojnë të lënë gjurmë.
Në portë, tekniku brazilian i ka besuar përvojës së Thomas Strakoshës, duke e shoqëruar me Elhan Kastratin dhe portierin e Egnatias, Mario Dajsinanin.
Reparti i mbrojtjes ndërtohet mbi eksperiencën e lojtarëve si Berat Gjimshiti, Elseid Hysaj, Ivan Balliu, Arlind Ajeti dhe Adrian Ismajli. Në listë janë gjithashtu Klisman Cake, Mario Mitaj dhe Naser Aliji, ndërsa risitë e këtij grumbullimi janë Bujar Pllana dhe Stavro Pilo.
Në mesfushë, Sylvinho ka përzgjedhur një kombinim stabiliteti dhe energjie me emra si Kristjan Asllani, Ylber Ramadani, Qazim Laçi dhe Juljan Shehu. Listës i shtohen Adrion Pajaziti, Nazmi Gripshi, Jasir Asani dhe Arbër Hoxha, ndërsa rikthehet pas tre vitesh mungesë edhe Anis Mehmeti.
Në repartin ofensiv spikat rikthimi i Ernest Muçit, i cili bashkohet me Armando Brojën, Myrto Uzunin dhe Nedim Bajramin për të udhëhequr sulmin kuqezi.
Nga ana tjetër, Kombëtarja do të duhet të bëjë pa Rey Manajn dhe Mirlind Dakun, të cilët mungojnë për shkak dëmtimesh.
Në rast fitoreje ndaj Polonisë, Shqipëria do të sigurojë një vend në finalen e madhe të play-off-it, ku do të përballet me fituesin e çiftit Ukrainë–Suedi, një hap vendimtar drejt kualifikimit historik në Botërorin 2026.