Krim i rëndë në familjen shqiptare në Austri: Burri dyshohet se vrau bashkëshorten
Një ngjarje e rëndë është shënuar në Austri, ku një burrë me origjinë nga Kosova dyshohet se ka vrarë bashkëshorten e tij 38-vjeçare.
Sipas mediave austriake, ngjarja ka ndodhur të dielën rreth orës 18:30 në Sooß, në komunën Baden. Viktima është gjetur në oborrin e banesës me plagë të rënda në trup, të shkaktuara si nga mjet prerës ashtu edhe nga armë zjarri.
Autori i dyshuar, një 47-vjeçar, është arrestuar menjëherë nga policia dhe ndodhet në paraburgim.
Sipas hetimeve paraprake, çifti kishte pasur konflikte të shpeshta kohët e fundit, megjithatë motivi i ngjarjes mbetet ende i paqartë.
Autoritetet kanë urdhëruar kryerjen e autopsisë për të përcaktuar shkakun e saktë të vdekjes, ndërsa në vendin e ngjarjes është gjetur edhe një pistoletë që dyshohet të jetë përdorur në krim.