Një ngjarje tragjike ka ndodhur në Partinico, pranë Palermos në Itali, ku një nënë 37-vjeçare dhe djali i saj 21-vjeçar kanë humbur jetën brenda një cisterne nëntokësore në garazhin e banesës së tyre.
Viktimat janë identifikuar si Rosalia La Manna, 37 vjeçe, dhe djali i saj, Vincenzo Troia, 21 vjeç. Sipas të dhënave paraprake, në ambientin ku ndodheshin dy viktimat kishte mungesë të oksigjenit dhe dyshohet për një përqendrim të lartë të dioksidit të karbonit.
Nga rindërtimi fillestar i ngjarjes, Vincenzo kishte zbritur në cisternë për të marrë disa rrjeta që familja i përdorte gjatë vjeljes së ullinjve. Dyshohet se ai është asfiksuar brenda pak minutash për shkak të kushteve të rrezikshme në ambientin e mbyllur.
Kur djali nuk po dilte dhe nuk po përgjigjej, nëna e tij zbriti në cisternë për ta kërkuar dhe për t’i ardhur në ndihmë. Edhe ajo u ekspozua ndaj të njëjtave kushte dhe humbi jetën.
Në vendngjarje mbërritën zjarrfikësit e njësisë së specializuar NBC, të cilët u detyruan të përdornin bombola oksigjeni gjatë ndërhyrjes për shkak të rrezikut të lartë. Kontrollet e para konfirmuan se në hapësirë nuk kishte nivel të mjaftueshëm oksigjeni për mbijetesë.
Rosalia La Manna ishte pronare e një biznesi bujqësor që merrej edhe me prodhimin e vajit të ullirit. Në cisternat nëntokësore familja ruante mjete bujqësore dhe rrjeta të përdorura për mbledhjen e ullinjve.
Një nga hipotezat e hetimit është se rrjetat dhe mbetjet bimore të qëndruara për një kohë të gjatë në ambient mund të jenë dekompozuar, duke favorizuar krijimin e dioksidit të karbonit dhe uljen e nivelit të oksigjenit.
Trupat e nënës dhe djalit u nxorën nga ekipet e shpëtimit, ndërsa personeli mjekësor konstatoi vdekjen e tyre.
Karabinierët kanë nisur hetimet për të përcaktuar me saktësi dinamikën e ngjarjes dhe shkakun përfundimtar të vdekjes.
