Shërbimi i transportit urban në Tiranë rrezikon të përballet me kufizime serioze, madje edhe me pezullim të përkohshëm duke nisur nga e hëna, për shkak të vështirësive të thella financiare që po përjetojnë operatorët e linjave të autobusëve.
Përfaqësuesi i sektorit, Kostandin Foni, deklaroi se situata është përkeqësuar si pasojë e mungesës së reagimit nga institucionet përgjegjëse, pavarësisht kërkesave të vazhdueshme për mbështetje, sidomos pas rritjes së çmimit të karburanteve.
Sipas tij, java e ardhshme do të jetë vendimtare për fatin e transportit publik në kryeqytet. Operatorët paralajmërojnë se, nëse nuk arrihet një marrëveshje emergjente, qytetarët mund të përballen me bllokim të lëvizjes së përditshme.
“Situata ka ardhur si pasojë e mungesës së masave konkrete nga institucionet. Ne kemi ndjekur të gjitha rrugët zyrtare për të adresuar problemin, por pa rezultat. Operatorët sot janë në pamundësi financiare për të vijuar shërbimin. Java e ardhshme do të jetë vendimtare: ose do të sigurohen fondet për paga, ose për furnizim me karburant,” u shpreh Foni.
Ai theksoi se sektori ka kërkuar riaktivizimin e paketës së emergjencës, përfshirë kompensimin e kostos së rritur të karburantit. Ndërkohë, punonjësit e transportit nuk kanë marrë ende pagat e muajit shkurt, ndërsa përballen me rritje të vazhdueshme të shpenzimeve për shkak të çmimeve në rritje.
Në mungesë të një zgjidhjeje të shpejtë, rreziku për ndërprerje të shërbimit mbetet i lartë, duke prekur drejtpërdrejt mijëra qytetarë që varen nga transporti publik çdo ditë.