Aktori amerikan James Handy gjendet i vdekur në banesën e tij, arrestohet djali i partneres
Aktori i njohur amerikan James Handy, i cili u bë i famshëm për rolet e tij në filma dhe seriale të suksesshme, është gjetur i pajetë në shtëpinë e tij në Los Angeles, në një ngjarje që ka tronditur opinionin publik.
Sipas mediave ndërkombëtare, 81-vjeçari dyshohet se humbi jetën pas një sulmi me thikë. Për ngjarjen është arrestuar Michael Gledhill, 44 vjeç, djali i partneres së aktorit, i cili përballet me akuza për vrasje.
Departamenti i Policisë së Los Angeles bëri të ditur se Handy u gjet në oborrin e banesës së tij në zonën e Tarzanës, Kaliforni, gjatë orëve të mëngjesit. Ai kishte marrë plagë të shumta me thikë në kraharor dhe u shpall i vdekur në vendngjarje.
Sipas autoriteteve, i dyshuari telefonoi vetë numrin e emergjencës 911 dhe gjatë telefonatës mori përsipër krimin. Kur policia mbërriti në vendngjarje, ai u identifikua si personi i kërkuar dhe u arrestua menjëherë.
Hetimet paraprake tregojnë se Michael Gledhill jetonte në të njëjtën banesë me nënën e tij, e cila kishte një lidhje me aktorin. Gjykata ka caktuar për të një garanci prej 2 milionë dollarësh.
James Handy lindi në Nju Jork dhe ndërtoi një karrierë të gjatë artistike që zgjati për dekada. Ai u bë i njohur për pjesëmarrjen në seriale të famshme si “Law & Order”, “Criminal Minds” dhe “NCIS: Los Angeles”, ndërsa paraqitja e tij e fundit në ekranin e madh ishte në filmin “Top Gun: Maverick” në vitin 2022.
Be First to Comment