Tragjedi në Gjermani: Gruaja humb jetën pas një sulmi me thikë, bashkëshorti i dyshuar arrestohet
Një grua humbi jetën mbrëmjen e së martës pas një sulmi me thikë në qendër të qytetit Kelkheim, pranë Frankfurtit, në Gjermani. Sipas raportimeve të mediave gjermane, i dyshuari për ngjarjen është bashkëshorti i saj.
Ngjarja ndodhi rreth orës 21:00 në zonën e Frankfurter Straße, një nga rrugët më të frekuentuara të qytetit. Në momentin e sulmit, në vendngjarje ndodheshin shumë qytetarë, të cilët reaguan menjëherë.
Dëshmitarët ndërhynë për të ndaluar autorin e dyshuar, duke e neutralizuar dhe mbajtur nën kontroll deri në mbërritjen e policisë. Më pas, efektivët e arrestuan atë në vendngjarje.
Sipas autoriteteve, i dyshuari pësoi lëndime të lehta gjatë ndërhyrjes së qytetarëve dhe mori ndihmë mjekësore. Ndërkohë, gruaja nuk arriti t’u mbijetonte plagëve të marra dhe u shpall e vdekur në vend.
Pas ngjarjes, policia bllokoi zonën dhe ekspertët kriminalistikë nisën menjëherë hetimet, duke mbledhur prova dhe marrë në pyetje dëshmitarët.
Për shkak se shumë persona ishin dëshmitarë të sulmit, në vendngjarje u angazhuan edhe ekipe të mbështetjes psikologjike për t’u ofruar ndihmë personave të prekur nga ngjarja.
Autoritetet deklaruan se, pas arrestimit të të dyshuarit, nuk kishte më rrezik për qytetarët. Megjithatë, hetimet vazhdojnë për të zbardhur motivin e sulmit dhe për të përcaktuar nëse mes bashkëshortëve kishte pasur konflikte të mëparshme.
Policia dhe prokuroria kanë nisur procedurat për hetimin e rastit si vrasje, ndërsa pritet të vendoset edhe për masën e sigurisë ndaj të dyshuarit.
Në përputhje me parimin e prezumimit të pafajësisë, personi i arrestuar konsiderohet i dyshuar deri në një vendim përfundimtar të gjykatës.
Ngjarja ka tronditur banorët e Kelkheimit, një qytet me rreth 28 mijë banorë në rajonin Main-Taunus, pasi krimi ndodhi në një nga zonat më të frekuentuara të qytetit.
Be First to Comment