Tiranë tronditet! 23-vjeçari qëllon me armë pas konfliktit në lokal, 5 të tjerë në kërkim
Një ngjarje e rëndë është regjistruar në Tiranë, ku një 23-vjeçar ka përfunduar në prangat e policisë pas një konflikti të dhunshëm të ndodhur disa ditë më parë në ambientet e jashtme të një lokali në Kamëz.
Sipas hetimeve, gjatë përplasjes mes disa personave, i riu dyshohet se ka nxjerrë armën e zjarrit dhe ka qëlluar në ajër për të kanosur një prej të përfshirëve, si dhe një tjetër person që ndërhyri për të shuar konfliktin. Fatmirësisht, nga të shtënat nuk raportohet për persona të lënduar.
Operacioni policor i koduar “Details”, i zhvilluar nga Komisariati Nr. 5, bëri të mundur identifikimin dhe arrestimin e të riut me inicialet A. H., banues në Tiranë.
Nga hetimet rezulton se në sherr janë përfshirë gjithsej 6 persona, ndërsa policia ka shpallur në kërkim edhe 5 të tjerë, të identifikuar me inicialet R. S., R. S., F. Gj., D. D. dhe R. Gj.
Ndërkohë, procedim penal ka nisur edhe ndaj pronarit të lokalit për moskallëzim krimi.
Policia vijon operacionin për kapjen e personave në arrati dhe për gjetjen e armës së përdorur, ndërsa dosja i është referuar Prokurorisë së Tiranës për veprime të mëtejshme.