16 vite pa asnjë gjurmë, gjyshi i Bleona Matës rrëfen detaje të reja për zhdukjen e saj
Kanë kaluar 16 vite, por fati i Bleona Matës vazhdon të mbetet një mister i pazbardhur. Vajza ishte vetëm 6 vjeçe kur u zhduk më 22 maj 2010 në Zapod të Kukësit, teksa ndodhej në zonën e kullotave së bashku me vajza të tjera të familjes.
Që prej asaj dite, familja ka jetuar me dhimbjen dhe pasigurinë, ndërsa kërkimet e shumta nuk kanë sjellë ende një përgjigje përfundimtare se çfarë ndodhi me vogëlushen.
Rasti i Bleonës është rikthyer vazhdimisht në vëmendjen e opinionit publik. Ndër vite janë ngritur pista dhe janë dhënë dëshmi të ndryshme, mes tyre edhe pretendime që lidhen me një familje në Vlorë. Këto dyshime janë kundërshtuar nga familjarët e përmendur dhe deri më tani nuk është bërë publike ndonjë provë përfundimtare që të sqarojë fatin e Bleonës.
Në një intervistë për emisionin “Me Zemër të Hapur”, gjyshi i Bleonës, Zenel Mata, ka rrëfyer çfarë kujton nga dita kur mbesa e tij u zhduk.
Ai tregon se atë ditë ishte duke kositur pranë shtëpisë dhe kishte parë Bleonën duke luajtur në fshat. Pak më vonë, pasi u kuptua se vajza nuk ishte më aty, banorët u mobilizuan dhe nisën kërkimet.
“Dita e errët. Zi për ne ka qenë”, rrëfen gjyshi, duke kujtuar momentet e para pas zhdukjes.
Sipas tij, kërkimet vazhduan për ditë të tëra, madje për rreth dy javë, por pa rezultat.
Gjatë intervistës, Zenel Mata mohon të ketë pasur konflikte apo hasmëri me fqinjët dhe kundërshton pretendimet që e lidhin familjen e tij me zhdukjen e Bleonës.
Ai flet gjithashtu për një dëshmi lidhur me një makinë që dyshohet se është parë në zonë ditën e zhdukjes, si dhe për dyshimet e tij ndaj një familjeje në Vlorë. Megjithatë, këto mbeten dyshime dhe pretendime të shprehura nga ai gjatë intervistës dhe nuk përbëjnë fakte të provuara.
Pavarësisht viteve që kanë kaluar, gjyshi thotë se vazhdon të besojë se Bleona mund të jetë gjallë.
Në fund të rrëfimit, ai i drejton një apel emocional mbesës së tij, duke kërkuar që, nëse një ditë ajo e dëgjon këtë intervistë dhe është gjallë, t’i japë familjes një shenjë.
“Jam shumë i mërzit për atë. Në qoftë se më dëgjon… të njoftojë të paktën njërin nga familja… që ‘jam gjallë e jam këtu’”, shprehet Zenel Mata.
Rrëfimi i tij rikthen edhe një herë në vëmendje një prej rasteve më të dhimbshme të një fëmije të zhdukur, ndërsa familja vijon të presë një përgjigje për fatin e Bleonës.