Tre të vrarë në një poligon qitjeje në Danilovgrad, në kërkim të autorit të dyshuar rus
Një ngjarje e rëndë ka tronditur Danilovgradin e Malit të Zi, ku tre punonjës të një poligoni qitjeje u vranë me armë zjarri pasditen e së hënës, 31 gusht.
Viktimat janë identifikuar si Petar Globareviç, 24 vjeç, nga Podgorica, Momir Radonjiç, 67 vjeç, nga Danilovgradi, dhe Nemanja Kapor, 20 vjeç, nga Podgorica.
Për ngjarjen autoritetet dyshojnë shtetasin rus 30-vjeçar Mihail Nikolaeviç Šabunjin, i cili pas krimit dyshohet se u largua nga vendngjarja me automjetin e njërit prej viktimave.
Sipas të dhënave të publikuara nga mediat malazeze, ngjarja ndodhi rreth orës 16:45 në poligonin “Češka zbrojevka”, në zonën e Danilovgradit.
Drejtori i Policisë së Malit të Zi, Lazar Šćepanoviç, deklaroi se hetuesit kanë arritur të rindërtojnë një pjesë të lëvizjeve të të dyshuarit. Sipas informacioneve paraprake, Šabunjin e kishte frekuentuar poligonin edhe në ditët para ngjarjes.
Edhe të hënën ai kishte shkuar në poligon dhe kishte kryer qitje. Më pas, sipas dyshimeve të policisë, ai hyri në ambientet e objektit dhe qëlloi tre punonjësit.
Pas vrasjeve, i dyshuari dyshohet se mori makinën e njërit prej viktimave dhe u largua nga zona.
Policia bëri të ditur se automjeti ishte një Seat Cordoba i zi, me targa PG AC 472, dhe publikoi të dhënat e tij në kuadër të kërkimeve për të dyshuarin.
Disa orë më vonë, automjeti u gjet në zonën e Rogamit, në territorin e Podgoricës. Sipas raportimeve, makina u gjet e braktisur në një livadh, pranë një restoranti.
Megjithatë, brenda automjetit nuk u gjet Šabunjin. Autoritetet dyshojnë se ai e ka braktisur makinën dhe ka vijuar arratisjen në këmbë ose me një mënyrë tjetër transporti.
Policia e konsideron 30-vjeçarin potencialisht të rrezikshëm, pasi dyshohet se mund të jetë ende i armatosur. Sipas autoriteteve, ai mund të ketë marrë me vete armë zjarri dhe municion pas largimit nga vendngjarja.
Për këtë arsye, policia u ka bërë thirrje qytetarëve që të mos tentojnë ta ndalojnë apo t’i afrohen në rast se e shohin, por të njoftojnë menjëherë autoritetet.
Operacioni i kërkimit është zgjeruar në disa zona të Malit të Zi. Në aksion janë përfshirë njësi të ndryshme policore, ndërsa kontrollet janë shtuar në rrugët kryesore, pikat kufitare dhe aeroportet, me qëllim parandalimin e largimit të të dyshuarit nga vendi.
Ndërkohë, hetuesit po përpiqen të zbardhin edhe motivin e vrasjes së trefishtë dhe të përcaktojnë nëse mes Šabunjinit dhe viktimave ka pasur ndonjë marrëdhënie apo konflikt të mëparshëm. Deri tani, motivi zyrtar nuk është bërë i ditur.
Ngjarja ka shkaktuar reagim të fortë në Mal të Zi. Qeveria ka shpallur 1 dhe 2 shtatorin ditë zie kombëtare në nderim të tre viktimave.
Kryeministri Milojko Spajiç ka shprehur ngushëllimet për familjet e viktimave dhe ka kërkuar që personi përgjegjës të vihet sa më shpejt përpara drejtësisë.
Ndërkohë, kërkimet për 30-vjeçarin rus vazhdojnë. Gjetja e automjetit ka ndihmuar hetuesit të ngushtojnë zonën e kërkimit, por dyshimi se i arratisuri mund të jetë ende i armatosur ka bërë që policia të mbajë në nivel të lartë masat e sigurisë.