A do të hyjë Pier Silvio Berlusconi në politikë? Tajani: “Ndoshta, por varet nga ai”
Spekulimet për një hyrje të mundshme të Pier Silvio Berlusconi në politikë po shtohen. Sekretari kombëtar i Forza Italia, Antonio Tajani, u pyet nga gazetarët në Dhomën e Deputetëve nëse djali i ish-kryeministrit italian Silvio Berlusconi mund të ndjekë të njëjtën rrugë.
“Ndoshta, por varet nga ai”, u përgjigj Tajani. Ai shtoi se nëse Pier Silvio do të vendoste të hynte në politikë, kjo do të ishte “një gjë e shkëlqyer”.
“A do të ishim të lumtur? Absolutisht. Njerëzit më të rëndësishëm hyjnë në betejë. Me emrin që mban, nëse vendos të angazhohet, do të ishte gjithmonë diçka pozitive”, tha veterani i së djathtës italiane.
Deklaratat e Tajanit vijnë pas komenteve të vetë Pier Silvio Berlusconi, të bëra gjatë prezantimit të programacionit të grupit Mediaset, ku ai është zëvendëspresident ekzekutiv.
Berlusconi theksoi se ndjen një lidhje të fortë me njerëzit e zakonshëm, por pranoi se politika është shumë më komplekse.
“Kam një pasion të madh për njerëzit. Kur udhëtoj dhe njerëzit më afrohen, pyes veten sa me fat jam që marr kaq shumë dashuri. Ndonjëherë e ngatërroj këtë ndjenjë me politikën, por politika është edhe kompromis, negocim dhe shumë gjëra të tjera”, tha ai.
56-vjeçari vuri në dukje edhe një paralelizëm me të atin: Silvio Berlusconi hyri në politikë në moshën 58-vjeçare.
“Sot nuk kam asnjë qëllim për t’u marrë me politikë, por duke parë drejt së ardhmes nuk e përjashtoj. Mund të vijë një moment kur të them: ‘Pse jo një sfidë e re?’ Megjithatë, tani për tani kjo ide nuk ka formë konkrete”, shtoi ai.
Pier Silvio Berlusconi theksoi se aktualisht është i përqendruar te biznesi, por nuk e mbyll derën për të ndjekur një ditë gjurmët e babait të tij.
Duke folur për të atin, ai u shpreh se e ndjen mungesën e tij më shumë se kurrë. Sipas tij, nëse Silvio Berlusconi do të ishte ende gjallë, do të kishte bërë gjithçka për të ndaluar konfliktet në Ukrainë dhe në Lindjen e Mesme.