Deputeti i Partisë Demokratike, Gent Strazimiri, ka reaguar në Komisionin e Ligjeve lidhur me masat e kërkuara nga SPAK dhe të vendosura nga GJKKO ndaj Vlora Hysenit, ish-drejtuese e Shërbimit Informativ të Shtetit.
Gjatë fjalës së tij, Strazimiri ngriti akuza të forta ndaj Hysenit, duke pretenduar se ajo kishte nxjerrë informacione shtetërore dhe ia kishte përcjellë Ergys Agasit. Deputeti foli edhe për një pretendim për marrëdhënie personale mes tyre.
“Në 36 vjet mezi prisnim që Prokuroria të arrestonte drejtorin e SHISH, që për arsye sentimentale, në disa vende ku nuk duhet të ishte, i ka dhënë dashnorit sekretet e shtetit”, deklaroi Strazimiri, duke e cilësuar çështjen si një zhvillim serioz për institucionet shtetërore.
Hyseni dyshohet nga SPAK për veprat penale të përkrahjes së autorit të krimit dhe nxjerrjes së sekretit shtetëror. Përgjegjësia e saj penale do të përcaktohet nga procesi gjyqësor.
Hetimi përfshin edhe persona të tjerë. Me urdhër të GJKKO-së, këtë të martë janë kryer kontrolle në banesën e ish-drejtorit të Përgjithshëm të Policisë, Ilir Proda, i cili gjithashtu është thirrur për t’u paraqitur në Prokurorinë e Posaçme.
Në të njëjtën dosje është caktuar masa e “arrestit me burg” edhe për Fatjon Kallucin, shef i Laboratorit Shkencor të Policisë në Tiranë, si dhe për një punonjës të një biznesi në Durrës. Sipas raportimeve, këta persona dyshohet se mund të kenë ndihmuar Ergys Agasin t’i shmangej arrestimit për një periudhë të gjatë.
Ndërkohë, për Ergys Agasin dhe ish-efektivin Ulian Shpataraku, Apeli i GJKKO-së ka konfirmuar masën e “arrestit me burg”.
Në kuadër të të njëjtit hetim është arrestuar edhe Ermal Beqiraj. Sipas SPAK, ai dyshohet se ka përfituar tendera nga Agjencia Kombëtare e Shoqërisë së Informacionit, ndërsa ndaj tij janë sekuestruar 11 pasuri.
Hetimet vijojnë për të përcaktuar rolin dhe përgjegjësinë e secilit prej personave të përfshirë në këtë çështje.