Kryeministri Edi Rama ka folur për luftën kundër korrupsionit në Shqipëri dhe për hetimet ndaj zyrtarëve të lartë, duke komentuar edhe arrestimin e ish-drejtoreshës së Shërbimit Informativ të Shtetit, Vlora Hyseni.
Në një intervistë për median gjermane WELT, Rama u pyet mbi situatën e korrupsionit në vend, arrestimet dhe hetimet e zhvilluara nga institucionet e drejtësisë. Një pjesë e veçantë e bisedës iu kushtua rolit të Strukturës së Posaçme Kundër Korrupsionit (SPAK) dhe rasteve që kanë përfshirë zyrtarë të niveleve të larta.
Duke iu referuar arrestimit të Hysenit, WELT e vendosi këtë rast në kontekstin e një serie hetimesh dhe procedimesh që kanë prekur figura të rëndësishme të administratës dhe politikës shqiptare.
Rama e cilësoi zhvillimin e institucioneve të drejtësisë si një ndryshim të rëndësishëm në mënyrën e funksionimit të shtetit shqiptar. Sipas tij, vendi ka kaluar nga një periudhë ku korrupsioni ishte pjesë e sistemit, drejt një faze ku institucionet po veprojnë kundër tij.
Pjesë nga intervista:
WELT: Në Shqipëri korrupsioni mbetet ende një problem. Drejtoresha e shërbimit sekret është arrestuar, ndërsa ka edhe shumë raste të tjera hetimesh dhe dënimesh. Çfarë po bëni kundër tij?
Rama: Shqipëria ishte një vend ku korrupsioni ishte sistemi. Sot Shqipëria është një vend ku sistemi lufton kundër korrupsionit. Jemi në fazën përfundimtare të pastrimit të vendit.
WELT: Struktura e Posaçme Kundër Korrupsionit, SPAK, nën mbikëqyrjen e SHBA-së dhe BE-së, po vepron ashpër ndaj zyrtarëve të lartë. A po funksionon?
Rama: Pjesërisht është e dhimbshme. Jo të gjitha procedurat përputhen me standardet evropiane, sipas mendimit tim. Shqipëria ka normën më të lartë të të burgosurve në paraburgim në kontinent. Por kjo është pjesë e një procesi të ashpër dhe të pashmangshëm. Për këtë duhet të marrim vlerësim.
WELT: Ka zëra që kërkojnë nga ju përgjegjësi politike, duke pasur parasysh arrestimet dhe dënimet e personave pranë jush…
Rama: Para se të merrja detyrën, që nga viti 1912, kur u krijua shteti ynë, asnjë ministër në Shqipëri nuk ishte paraqitur ndonjëherë përpara një prokurori të pavarur. Jam krenar që vendi ynë tani është në gjendje t’i mbajë njerëzit përgjegjës, kudo që ndodhen. Kjo është përgjegjësia ime politike.