Prokuroria Themelore në Prishtinë ka kërkuar nga Gjykata Themelore caktimin e masës së paraburgimit ndaj ish-deputetit Gani Geci, i cili dyshohet për kanosje ndaj gazetarit Lirim Mehmetaj.
Sipas informacionit të bërë publik, kërkesa e Prokurorisë lidhet me dyshimet për kryerjen e veprës penale të kanosjes. Për këtë çështje, vendimin përfundimtar lidhur me masën e sigurisë do ta marrë gjykata.
Zëdhënësja e Gjykatës Themelore në Prishtinë, Mirlinda Gashi, ka konfirmuar se seanca dëgjimore është paraparë të mbahet sot, në orën 13:00.
Seanca pritet të zhvillohet para gjyqtarit të procedurës paraprake, Albert Haliti. Deri në marrjen e vendimit, kërkesa për paraburgim mbetet në shqyrtim nga gjykata.