Personat që kanë përdorur një tokë shtetërore për më shumë se 10 vjet, pa qenë pronarë të saj, mund të kenë mundësinë ta fitojnë pronësinë përmes “Paketës së Maleve”, në përputhje me kushtet dhe procedurat e përcaktuara në ligj.
Kjo nismë synon të nxisë investimet në zonat malore me përparësi zhvillimi, duke mbështetur rimëkëmbjen ekonomike, krijimin e vendeve të punës, përmirësimin e kushteve të jetesës dhe shfrytëzimin e qëndrueshëm të burimeve natyrore.
Sipas ligjit, pasuritë e paluajtshme shtetërore që plotësojnë kriteret mund të kalojnë në pronësi përmes shitjes me një çmim simbolik prej 1 euroje. Kjo mundësi u drejtohet personave që kanë pasur posedim faktik, të vazhdueshëm dhe të pandërprerë të tokës për të paktën 10 vjet, duke e përdorur atë sikur të ishin pronarët e saj.
Përfituesit duhet të dëshmojnë lidhjen me pronën dhe të ndjekin procedurat ligjore. Megjithatë, mungesa e dokumentacionit provues nuk e pengon automatikisht procesin administrativ të njohjes si posedues jopronar, për sa kohë që nuk paraqiten prova kundërshtuese gjatë procedurave të parashikuara.
Mundësia përfshin edhe persona që nuk e përdorin aktualisht pronën, por që mund të vërtetojnë lidhjen e tyre me të dhe synojnë ta zhvillojnë përmes një investimi.
Si duhet të veprojnë të interesuarit?
Hapi i parë është paraqitja e një kërkese pranë njësisë së vetëqeverisjes vendore për njohjen si posedues jopronar. Kërkesa duhet të shoqërohet me planin e rilevimit të sipërfaqes, të hartuar nga një ekspert gjeodet i licencuar.
Pas shqyrtimit të dokumentacionit, institucionet vendore vendosin nëse kërkesa mund të miratohet. Në rast përgjigjeje pozitive, procedura vijon pranë Agjencisë së Zhvillimit të Territorit për lejen e zhvillimit. Më pas paraqitet kërkesa për blerjen e pronës pranë ministrisë përgjegjëse dhe, nëse plotësohen kushtet, lidhet kontrata e shitjes.
Përfitimet për investitorët
Personat që fitojnë pronësinë, realizojnë projektin dhe zhvillojnë aktivitetin e deklaruar mund të përfitojnë lehtësi fiskale për një periudhë 10-vjeçare, sipas kushteve të ligjit.
Këto përfshijnë përjashtime nga taksa e ndikimit në infrastrukturë, taksa mbi pasuritë e paluajtshme, TVSH-ja dhe tatimi mbi të ardhurat. Gjithashtu, parashikohet përparësi në përfitimin e granteve, veçanërisht për projekte në agroturizëm dhe në sektorin e përpunimit.
Nisma synon të kthejë pronat e pashfrytëzuara në mundësi zhvillimi ekonomik, por përfitimi nuk është automatik: çdo rast duhet të plotësojë kriteret ligjore dhe t’i nënshtrohet procedurave përkatëse.