Ministri i Brendshëm, Ervin Demo, ka reaguar lidhur me protestat në Tiranë, duke akuzuar qarqe politike se po përpiqen të shfrytëzojnë pakënaqësitë e studentëve për të nxitur tensione dhe akte dhune.
Në deklaratën e tij, Demo pretendon se pas episodeve të shkatërrimit të pronës publike dhe private qëndrojnë persona me interesa politike, ndërsa përmend edhe ndikimin e aktorëve të huaj përmes rrjeteve sociale. Ai paralajmëroi se personat përgjegjës për zjarrvëniet dhe dëmtimet do të mbajnë përgjegjësi para ligjit.
Ministri iu drejtua gjithashtu studentëve, veçanërisht atyre të mjekësisë, duke u kërkuar të mos lejojnë që kërkesat e tyre të përdoren për qëllime politike. Ai theksoi se qeveria është e gatshme të dëgjojë shqetësimet e tyre dhe se dialogu mbetet rruga për zgjidhjen e problematikave.
Demo përshëndeti edhe efektivët e Policisë së Shtetit për mënyrën se si, sipas tij, kanë përballuar situatën gjatë protestave.
Ndërkohë, në një moment që ka tërhequr vëmendjen, ministri foli edhe për atë që e cilësoi si një skenar të organizuar, duke lënë të kuptohet se autoritetet disponojnë informacione që ende nuk janë bërë publike.
“Dimë shumë më tepër sesa mund të ndajmë me ju sonte”, deklaroi Demo në përfundim të reagimit të tij.
Ai shtoi se, sipas tij, përpjekjet për të krijuar pasiguri nuk do të arrijnë ta kthejnë Shqipërinë pas, ndërsa u bëri thirrje qytetarëve të ruajnë qetësinë dhe durimin gjatë zhvillimeve të ardhshme.