Seanca e radhës plenare në Kuvendin e Shqipërisë ka nisur mes tensioneve dhe përplasjeve të forta, ku zhurma dhe kaosi kanë vështirësuar zhvillimin normal të punimeve.
Situata e tensionuar lidhet me bllokimin e seancës nga deputetët e opozitës, si dhe me përjashtimet e fundit të disa prej tyre nga Komisioni i Etikës. Që në momentet e para të mbledhjes, salla u përfshi nga zhurma dhe debatet, duke krijuar vështirësi në vijimin e seancës.
Tensionet u shtuan edhe gjatë njoftimit të ndryshimeve në delegacionet parlamentare, ku u bënë të ditura emërimet e reja të deputeteve Elisa Spiropali dhe Evis Kushi.
Spiropali u caktua anëtare e Komitetit Parlamentar të Stabilizim-Asociimit, ndërsa Evis Kushi u emërua anëtare zëvendësuese në këtë delegacion.
Gjatë njoftimit, kryetari i Kuvendit, Niko Peleshi, u kërkoi deputetëve të zinin vendet dhe të vijonin me punimet, duke theksuar se më pas do të kishin mundësinë të ngrinin çështjet dhe shqetësimet e tyre.
Megjithatë, situata në sallë mbeti e tensionuar, ndërsa përplasjet mes opozitës dhe drejtuesve të seancës vijuan të shoqëronin zhvillimet në Kuvend.