Drutë për dimër shtrenjtohen në Prishtinë, metri arrin deri në 70 euro
Çmimi i druve për ngrohje në tregun e Prishtinës po lëviz nga 65 deri në 70 euro për metër kub, një shumë që shitësit e konsiderojnë të arsyeshme, por që për shumë qytetarë është e vështirë për t’u përballuar. Lajmi është raportuar nga KosovaPress.
Sipas tregtarëve, kërkesa për dru mbetet e lartë, ndërsa çmimi është ndikuar edhe nga mungesa e punëtorëve dhe kostot e larta të angazhimit të tyre.
Njëri nga shitësit në kryeqytet ka deklaruar se si drutë e ahut, ashtu edhe ato të bungut, shiten me çmim të njëjtë, rreth 70 euro për metër kub. Ai ka theksuar se çmimi është pothuajse i pandryshuar nga viti i kaluar dhe se, pavarësisht ankesave të disa blerësve, shitjet vazhdojnë.
Edhe tregtarë të tjerë konfirmojnë se çmimi i druve këtë vit sillet nga 65 deri në 70 euro, duke shtuar se qytetarët kanë reagime të ndryshme ndaj kostos së ngrohjes.
Megjithatë, për familjet me të ardhura të kufizuara, kjo shumë konsiderohet e lartë. Qytetari Marad Dushi është shprehur se një metër kub dru me çmim prej 70 eurosh është i papërballueshëm, duke theksuar se rritja e pagave nuk e ka kompensuar shtrenjtimin e përgjithshëm të produkteve dhe shërbimeve.
Edhe qytetari Enver Ahmeti e ka vlerësuar çmimin si të lartë, duke thënë se edhe një nivel prej 60 deri në 65 euro do të ishte më i përballueshëm për qytetarët.
Përveç druve, edhe peleti mbetet një alternativë me kosto të konsiderueshme. Sipas raportimeve nga tregu, një ton pelet kushton rreth 380 euro.
Të dhënat e Agjencisë së Statistikave të Kosovës tregojnë se çmimi mesatar i një metri kub dru në shtator të vitit 2025 ishte 57,68 euro.
Ndërkohë, për banorët e disa zonave të Prishtinës, një mundësi tjetër për ngrohje është rrjeti i Termokosit, i cili ka nisur sezonin e ngrohjes më 15 tetor.
Qytetarët kërkojnë mbështetje më të madhe institucionale, në mënyrë që sigurimi i ngrohjes gjatë muajve të ftohtë të mos rëndojë edhe më shumë buxhetin familjar.
Ministria e Ekonomisë, dy vite më parë, kishte ofruar subvencione për pajisje efiçiente të ngrohjes për shtëpi dhe banesa./KP