Moderatorja e njohur Arbana Osmani ka thyer heshtjen pas disa ditësh, duke reaguar për situatën e tensionuar në Shqipëri dhe protestat e zhvilluara së fundmi. Përmes një postimi në rrjetet sociale, ajo i është drejtuar drejtpërdrejt kryeministrit Edi Rama, duke i kërkuar të dëgjojë qytetarët.
Osmani thekson se ngjarjet e ditëve të fundit nuk duhet të shihen si një spektakël për t’u komentuar nga distanca, por si një realitet që kërkon reflektim dhe mirëkuptim përpara çdo reagimi.
Si nënë e tre fëmijëve, moderatorja shprehet se e prek thellë fakti që të rinj, disa prej të cilëve në moshën e djalit të saj, po përballen me dhunë dhe po përfundojnë të lënduar gjatë protestave. Ajo shpreh gjithashtu keqardhjen për pamjet e kryeqytetit të përfshirë nga përplasjet dhe shkatërrimet.
Në reagimin e saj, Arbana Osmani dënon dhunën në të gjitha format, si atë të ushtruar nga policia ndaj protestuesve, ashtu edhe dëmtimin e institucioneve dhe bizneseve publike e private. Ajo kritikon gjithashtu personat që, sipas saj, përpiqen ta justifikojnë dhunën përmes reagimeve në rrjetet sociale.
Në fund të mesazhit, moderatorja i drejton një apel të qartë kreut të qeverisë, duke kërkuar respekt për qytetarët dhe dëgjimin e kërkesave të tyre.
“Si qytetare e këtij vendi ku kam vendosur të rris fëmijët e mi, sot më shumë se kurrë ndjej t’i them me zë të lartë kryeministrit: Mjaft; respekto popullin tënd, dëgjoje. Askush nuk e meriton këtë”, shkruan Arbana Osmani.