Regjisori i njohur Sebastian Lelio, i cili fitoi famë ndërkombëtare me filmin “Gloria” dhe më vonë u vlerësua me çmimin Oscar për filmin “A Fantastic Woman” (2017), ka ndërruar jetë papritur në moshën 52-vjeçare.
Lajmin për vdekjen e tij e bëri të ditur partnerja, Amalia Kassai, përmes një postimi në Instagram. Ajo konfirmoi se regjisori ishte ndarë nga jeta për arsye shëndetësore, por nuk dha detaje të mëtejshme lidhur me shkakun e vdekjes.
“Kujtimi i tij do të mbetet përgjithmonë mes nesh”, thuhej në mesazhin e saj, ku Lelio përshkruhej si një njeri i jashtëzakonshëm, që dha një kontribut të rëndësishëm në kulturën kiliane.
Sipas raportimeve të mediave në Kili, regjisori ndërroi jetë në banesën e tij në Las Condes, në kryeqytetin Santiago.
Sebastian Lelio, i lindur në Argjentinë dhe i rritur në Kili, arriti njohjen ndërkombëtare me filmin “Gloria”, të publikuar në vitin 2013. Interpretimi i aktores Paulina García në këtë produksion u shpërblye me çmimin “Ariu i Argjendtë” për aktoren më të mirë në Festivalin e Filmit në Berlin.
Suksesi i tij u bë edhe më i madh në vitin 2017, me filmin “A Fantastic Woman”, ku interpretonte aktorja Daniela Vega. Filmi rrëfen historinë e një gruaje transgjinore, jeta e së cilës ndryshon rrënjësisht pas vdekjes së partnerit të saj.
Produksioni u vlerësua me çmimin Oscar për filmin më të mirë ndërkombëtar, duke u bërë një nga arritjet më të rëndësishme të kinematografisë kiliane. Përveç suksesit artistik, filmi nxiti edhe një debat të gjerë shoqëror, i cili kontribuoi në ndryshimet ligjore në Kili lidhur me njohjen e identitetit gjinor.
