Ministri grek i Mbrojtjes Civile, Yiannis Kefalogiannis, ministri i Zhvillimit Rural, Kostas Tsiaras, si dhe zëvendësministri i Shëndetësisë, Dimitris Vartzopoulos, kanë paraqitur dorëheqjen këtë të premte, në një moment kur dosjet e skandalit OPEKEPE po i dërgohen Parlamentit grek.
Sipas mediave në Greqi, Evangelos Tournas pritet të marrë drejtimin e Ministrisë së Mbrojtjes Civile, duke zëvendësuar Kefalogiannis. Ndërkohë, Margaritis Schinas do të emërohet ministër i Zhvillimit Rural në vend të Tsiaras, ndërsa Makarios Lazaridis pritet të marrë postin e zëvendësministrit në të njëjtën ministri. Vartzopoulos, sipas burimeve, nuk do të ketë zëvendësues.
Gazeta Kathimerini raporton gjithashtu se pritet dorëheqja e Kostas Skrekas nga posti i sekretarit të partisë Demokracia e Re. Njoftimi zyrtar për ndryshimet në qeveri pritet në orën 12:30, ndërsa betimi i ministrave të rinj do të zhvillohet të shtunën.
Në sfond të këtyre zhvillimeve qëndron një skandal i madh financiar. Prokurorët e Zyra Evropiane e Prokurorit Publik kanë kërkuar heqjen e imunitetit për 11 deputetë grekë, të dyshuar për përfshirje në një skemë mashtrimi me fondet bujqësore të Bashkimit Evropian.
Hetimet tregojnë se që nga viti 2018, rrjeti ka përvetësuar të paktën 23 milionë euro përmes deklarimeve të rreme. Të dyshuarit kanë aplikuar për subvencione për toka që nuk i zotëronin, si dhe kanë fryrë numrin e kafshëve në ferma. Në disa raste, përfituesit nuk kishin asnjë lidhje me bujqësinë.
Skema u bë e mundur pas ndryshimeve në Politikën e Përbashkët Bujqësore të BE-së në vitin 2014, kur subvencionet nisën të bazoheshin në sipërfaqen e tokës dhe jo më në numrin e kafshëve. Në mungesë të një regjistri të saktë të pronësisë së tokës në Greqi, kjo hapi rrugë për abuzime të shumta.
Ndër rastet më të pazakonta të zbuluara në hetim përfshihen deklarime për livadhe në zona arkeologjike, ullinj të pretenduar brenda një aeroporti ushtarak, si dhe plantacione bananesh të raportuara në zonën e Malit Olimp.