Një tërmet me magnitudë 5.2 ballë të shkallës Rihter ka goditur sot provincën lindore të Vanit në Turqi, duke shkaktuar shqetësim te banorët e zonës dhe më gjerë.
Sipas të dhënave paraprake nga agjencia turke për menaxhimin e fatkeqësive (AFAD), deri tani nuk raportohet për viktima apo dëme materiale. Megjithatë, ekipet e emergjencës janë në terren dhe po kryejnë kontrolle për të verifikuar nëse ka dëmtime të mundshme.
Autoritetet bëjnë të ditur se tërmeti ka ndodhur në zonën e Tuşba-s rreth orës 08:52 të mëngjesit, me një thellësi prej rreth 7 kilometrash, çka e bën atë relativisht të cekët dhe më të ndjeshëm në sipërfaqe.
Banorët kanë treguar se lëkundjet zgjatën disa sekonda dhe shkaktuan panik të lehtë, duke i detyruar shumë prej tyre të dalin jashtë banesave për siguri.
Lëkundjet janë ndjerë edhe në provincat përreth, ndërsa autoritetet po monitorojnë situatën për mundësinë e pasgoditjeve. Institucionet u bëjnë thirrje qytetarëve të ruajnë qetësinë, të ndjekin udhëzimet zyrtare dhe të shmangin përhapjen e informacioneve të pakonfirmuara.