Kandidatura e deputetit Erion Braçe për Bashkinë e Tiranës ka shkaktuar reagime të shumta, ku një pjesë e madhe e mbështetësve e konsiderojnë atë si një zgjedhje të përshtatshme për drejtimin e kryeqytetit.
Së fundmi, vëmendje ka tërhequr deklarata e kreut të Partisë Agrare Ambientaliste, Agron Duka, një aleat i hershëm i Sali Berishës, i cili këtë herë është shprehur hapur në favor të Braçes.
Në një intervistë për News 24, Duka e vlerësoi Braçen si një figurë të ndershme dhe me përvojë të gjerë, duke theksuar se ai mund të sjellë ndryshime pozitive në Tiranë.
“Nëse Braçe vendos të kandidojë, unë do t’i jap votën time. Është një njeri që ia vlen, me eksperiencë dhe kontribut të madh. Ka gjithashtu nuhatje politike dhe e njoh prej kohësh. Erion Braçe, kam simpati personale, edhe për shkak të angazhimit të tij në çështjet e bujqësisë. Është i duhuri për Bashkinë e Tiranës.
Si njeri është i ndershëm dhe do i bënte mirë Tiranës. Ka përvojë të jashtëzakonshme. Nëse vendos të kandidojë, unë do ta mbështes. Ai ka kontribut dhe eksperiencë të madhe në politikë,” u shpreh Duka.