Të jesh nënë e një fëmije të vogël dhe ta ushqesh me gji në një vend publik nuk është aspak e lehtë. Edhe pse shoqëria ka bërë përparime, ende ka njerëz që gjykojnë, hedhin vështrime të pakëndshme apo madje ankohen kur shohin një nënë që kujdeset për foshnjën e saj.
Këtë e di shumë mirë Jackie Johnson-Smith, një nënë nga SHBA, e cila ka ushqyer me gji të tre fëmijët e saj. Gjatë kësaj kohe, ajo është përballur me reagime nga më të ndryshmet.
“Disa më buzëqeshnin, të tjerë më shikonin me siklet. Ndihesha gjithmonë nën vëzhgim”, ka shkruar ajo në Facebook.
Por një ditë, gjatë një dreke të zakonshme me familjen në një restorant, ndodhi diçka që nuk do ta harrojë kurrë.
Teksa ishin ulur në tavolinë, foshnja e saj filloi të qante nga uria. Edhe pse ushqyerja me gji ishte gjëja më natyrale për të bërë, Jackie hezitoi. Ajo kishte frikë nga reagimet e njerëzve përreth.
Për të shmangur çdo situatë të pakëndshme, vendosi të çohej dhe të dilte për jashtë, pa i kërkuar askush këtë. Nuk donte të shqetësonte askënd.
Gjatë gjithë kohës, kamarierja dukej se e kishte vënë re.
Kur Jackie u kthye në tavolinë, burri i saj kishte kërkuar faturën. Por bashkë me të, e priste edhe një surprizë.
Në faturë ishte shkruar një mesazh i shkurtër, por shumë domethënës:
“Një nga picat është paguar nga unë. Falenderoje gruan tënde që ushqen me gji fëmijën tuaj.”
Një gjest i vogël, por që i dha asaj një ndjesi mbështetjeje dhe respekti, duke i treguar se jo të gjithë gjykojnë — disa zgjedhin të vlerësojnë.