Një dasmë që duhej të ishte dita më e lumtur për një çift të ri në Turqi, përfundoi në një tragjedi të rëndë. Një 23-vjeçar humbi jetën pasi u qëllua aksidentalisht gjatë ceremonisë martesore në një fshat të provincës veriore të Giresunit.
Sipas mediave vendase, i riu – i cili sapo kishte kurorëzuar dashurinë e tij – ndërroi jetë një ditë pas dasmës, si pasojë e plagëve të marra nga arma e zjarrit.
Hetimet paraprake tregojnë se incidenti ndodhi kur një e afërme nga ana e dhëndrit, në shenjë festimi, hapi zjarr me armë. Të shtënat, të menduara si pjesë e gëzimit, rezultuan fatale duke e goditur vetë dhëndrin. Policia ka ndërhyrë menjëherë dhe ka arrestuar të dyshuarën, e cila pritet të përballet me akuza për shkaktim vdekjeje nga pakujdesia.
Ngjarja ka tronditur opinionin publik në Turqi, pasi raste të tilla nuk janë të rralla. Qitjet festive me armë zjarri vijojnë të mbeten një problem serioz, duke sjellë shpesh pasoja tragjike. Sipas të dhënave nga organizata vendase, në vend qarkullojnë miliona armë, një pjesë e madhe e të cilave mbahen në mënyrë të paligjshme.
Vetëm pak ditë më parë, një incident i ngjashëm u shënua edhe në provincën e Trabzonit, ku një person humbi jetën dhe dy të tjerë u plagosën gjatë një tjetër dasme. Këto ngjarje kanë nxitur thirrje të vazhdueshme për ndalimin e përdorimit të armëve në festa dhe për forcimin e masave të sigurisë.
Për familjen e të riut nga Giresuni, dita e gëzimit u kthye në zi. Komuniteti lokal mbetet i tronditur, ndërsa autoritetet kanë premtuar hetim të plotë për të parandaluar tragjedi të ngjashme në të ardhmen.