Një fotografi e kryeministres italiane Giorgia Meloni me Gioacchino Amico, aktualisht i pandehur në procesin “Hydra” për lidhje me krimin e organizuar në Lombardi, ka ndezur debat të fortë në Itali.
Fotoja daton më 2 shkurt 2019 dhe është realizuar gjatë një aktiviteti të partisë “Vëllezërit e Italisë” në një hotel në Milano, në prag të zgjedhjeve evropiane. Në atë periudhë, Amico ishte arrestuar për mashtrim dhe aktivitete të tjera të dyshuara kriminale, por ende nuk konsiderohej si pjesë e rrjeteve mafioze.
Sipas mediave italiane, hetuesit e shohin Amicon si një figurë të rëndësishme në strukturat kriminale të Lombardisë, me lidhje të dyshuara me organizata si Camorra dhe ‘Ndrangheta, si dhe me rrjete të afërta me bosin mafioz Matteo Messina Denaro. Publikimi i fotos ka nxitur reagime nga opozita, e cila ka ngritur pikëpyetje mbi aksesin e tij në ambiente politike dhe madje edhe institucionale, duke kërkuar hetime të plota.
Nga ana e saj, Giorgia Meloni e ka cilësuar situatën si një sulm politik. Ajo theksoi se, gjatë karrierës së saj, ka realizuar mijëra foto me qytetarë të ndryshëm dhe se është e pamundur të verifikohet identiteti i secilit person.
“Në dekada aktiviteti politik, ekzistojnë dhjetëra mijëra foto me njerëz që kërkojnë thjesht një selfie. Kjo është diçka që i ndodh çdo politikani. Unë sfidoj këdo të gjejë deklarata të mia kundër kolegëve që janë gjendur në situata të ngjashme,” u shpreh ajo.
Meloni shtoi gjithashtu se qëndrimi i saj kundër mafies ka qenë gjithmonë i qartë dhe i qëndrueshëm, duke e cilësuar publikimin e kësaj fotografie si një përpjekje me prapavijë politike.