Një ngjarje tragjike është regjistruar paraditen e sotme në rrugën “Remzi Hoxha” në Ferizaj, ku një punëtor ka humbur jetën gjatë punimeve në një objekt në ndërtim.
Sipas informacioneve paraprake, viktima, një burrë rreth 59 vjeç, dyshohet se ka rënë nga kati i gjashtë i godinës ku po punonte.
Rastin e ka konfirmuar zëdhënësi i Policisë për rajonin e Ferizajt, Kanun Veseli, i cili bëri të ditur se menjëherë pas njoftimit, në vendngjarje kanë dalë patrullat policore dhe ekipet emergjente, të cilat kanë konstatuar vdekjen e viktimës.
“Me datë 13.04.2026, rreth orës 11:45, kemi pranuar informatë se në rrugën ‘Remzi Hoxha’ një person ka rënë nga një objekt në ndërtim. Njësitë policore kanë dalë menjëherë në vendin e ngjarjes, ndërsa ekipet mjekësore kanë konfirmuar vdekjen e tij,” thuhet në njoftimin zyrtar.
Policia ka siguruar vendin e ngjarjes, ndërsa lidhur me rastin janë njoftuar njësitë e hetimeve, forenzika rajonale si dhe inspektorët komunal të punës, të cilët pritet të zbardhin rrethanat e plota të incidentit.
Autoritetet kanë bërë të ditur se për detaje shtesë do të ketë informacione në vijim.