Kanë kaluar 15 vite nga zhdukja e Bleona Mata, ndërsa familjarët pretendojnë se së fundmi kanë marrë një informacion të ri që u ka dhënë shpresë.
Sipas tyre, nëna e Gentianës – njëra prej pesë vajzave që ndodheshin me Bleonën ditën e zhdukjes – i ka thënë familjes Mata se vajza do të kthehej brenda tre ditësh. Ky informacion është bërë i ditur fillimisht për nënën e Bleonës dhe më pas është konfirmuar edhe nga gjyshi i saj, Zenel Mata.
Gjyshi tregon se kur ka kërkuar më shumë sqarime nga nëna e Gentianës, ajo është tërhequr nga deklarata, duke thënë se bëhej fjalë vetëm për një ëndërr. Ai shton gjithashtu se vajzat që ishin me Bleonën atë ditë janë shpërndarë dhe se personi i fundit që e ka parë ka qenë Qamilja, e cila sipas tij shmang kontaktet dhe nuk jep shpjegime.
Nga ana tjetër, nëna e Bleonës, Bukurie Veizi, vijon të këmbëngulë se e bija mund të jetë dorëzuar tek rrëmbyesit nga dikush që ndodhej pranë saj atë ditë. Ajo shpreh dyshime se e vërteta mund të jetë shumë më afër sesa mendohet dhe se disa persona kanë dijeni për atë që ka ndodhur.
Rasti i Bleona Mata mbetet një nga më misteriozët në Shqipëri. Ajo u zhduk më 22 maj 2010, në moshën 6-vjeçare, teksa kulloste bagëtitë në malin e fshatit Zapod, në Kukës. Pavarësisht kërkimeve intensive nga policia dhe banorët e zonës, asnjë gjurmë e saj nuk është gjetur deri më sot.
Që në fillim, dyshimet u përqendruan tek vajzat që e shoqëronin, përfshirë edhe një të afërme të saj. Megjithatë, hetimet e autoriteteve nuk arritën të provonin përfshirjen e tyre në ngjarje. Ndërkohë, familjarët vijojnë të kërkojnë të vërtetën, duke shpresuar se një ditë misteri do të zbardhet.