Autoritetet në Austri kanë ngritur alarmin për një rast serioz që lidhet me sigurinë ushqimore, pasi në një produkt për fëmijë është zbuluar një substancë shumë e rrezikshme.
Sipas policisë në rajonin e Burgenlandit, një kavanoz 190 gramësh me ushqim për fëmijë “Karrota dhe Patate” i markës HiPP, i raportuar nga një qytetar, rezultoi pozitiv për helm për minjtë pas analizave laboratorike. Rasti ka nxitur një reagim të menjëhershëm, duke çuar në tërheqjen e produktit nga rreth 1,500 supermarkete.
Kompania HiPP bëri të ditur se nuk mund të përjashtohet mundësia e manipulimit të produktit, duke paralajmëruar se konsumimi i tij mund të jetë i rrezikshëm për jetën. Si masë sigurie, të gjitha kavanozët e dyshuar janë hequr nga tregu në Austri, si dhe në disa vende të tjera.
Autoritetet kanë theksuar se kavanozët e prekur mund të dallohen nga shenja të pazakonta si kapak i dëmtuar, mungesë e vulës së sigurisë apo erë e dyshimtë. Ndërkohë, hetimet janë zgjeruar edhe në vende të tjera si Republika Çeke dhe Sllovakia, ku janë gjetur gjithashtu gjurmë të substancave toksike në produkte të ngjashme.
Rasti është ende nën hetim, ndërsa autoritetet u bëjnë thirrje qytetarëve të tregojnë kujdes maksimal dhe të mos konsumojnë produkte të dyshimta.