Në seancën e sotme në çështjen penale të vrasjes së Liridona Ademajt, vëllai i saj, Leonardi, mori fjalën në emër të familjes për krimin e rëndë ndaj motrës së tyre.
Ai tha se familja ka zgjedhur të besojë në drejtësi, në vend të zhgënjimit, dhe pret që gjykata të marrë një vendim të drejtë në këtë rast.
Sipas tij, është bërë e qartë për të gjithë se Naim Murseli ka qenë i përfshirë në organizimin e vrasjes, së bashku me persona të tjerë, ndërsa ekzekutori i dyshuar është Granit Plava.
“Ky proces është shumë i rëndësishëm, jo vetëm për familjen tonë, por edhe për shoqërinë. Fëmijët e Liridonës do të rriten me kujtimin e nënës së tyre dhe me të drejtën për të kërkuar drejtësi për të. Shpresojmë që ky rast të shërbejë si mesazh i qartë kundër dhunës dhe krimeve të tilla,” u shpreh ai.