Është ndarë nga jeta artisti i njohur nga Fieri, Shaban Zeneli, i vlerësuar si “Bilbili i Çamërisë”, pas një përballjeje të gjatë me një sëmundje të rëndë.
Lajmi i dhimbshëm është bërë publik nga familjarët e tij, duke sjellë trishtim të madh në mesin e komunitetit artistik dhe të gjithë dashamirësve të muzikës popullore. Shaban Zeneli ishte një ndër zërat më autentikë dhe përfaqësues të këngës çame në Shqipëri, i cili gjatë karrierës së tij të gjatë në skenë, la gjurmë të pashlyeshme me interpretimet plot shpirt dhe ndjenjë.
Me përkushtim të rrallë, ai ruajti dhe përcolli traditat muzikore të Çamërisë, duke i sjellë ato pranë publikut ndër breza. Këngët e tij u bënë pjesë e zemrave të shumë njerëzve, veçanërisht në Fier dhe në mbarë vendin, ku ai gëzonte respekt të madh si figurë e artit popullor.
Ceremonia e lamtumirës do të zhvillohet sot në varrezat e qytetit të Fierit.
Me largimin e tij, muzika popullore shqiptare humb një zë unik, por kujtimi dhe trashëgimia artistike që la pas do të jetojnë përgjithmonë.