TRAGJEDI E RËNDË NË MAQEDONINË E VERIUT – Humb jetën këngëtari i njohur operistik Riste Velkov bashkë me djalin e tij 20-vjeçar
Një aksident tragjik ka tronditur Maqedoninë e Veriut, ku mes viktimave mbetën këngëtari i njohur operistik Riste Velkov, 51 vjeç, dhe djali i tij Adami, vetëm 20 vjeç.
I riu ishte student i vitit të dytë në Fakultetin e Shkencave të Informacionit dhe Inxhinierisë Kompjuterike. Në automjet ndodheshin edhe dy të rinj të tjerë 20-vjeçarë, të cilët gjithashtu humbën jetën në vendngjarje.
Sipas informacioneve nga autoritetet maqedonase, aksidenti ndodhi më 21 maj 2026 rreth orës 23:00. Dyshohet se një kamion i tipit “MAN”, i drejtuar nga një 76-vjeçar nga Kosova, humbi kontrollin, kaloi në kahun e kundërt dhe u përplas fuqishëm me veturën ku udhëtonin viktimat.
Pas përplasjes së fortë, të dy mjetet u përfshinë nga flakët dhe u dogjën pothuajse plotësisht. Në vendngjarje ndërhynë zjarrfikësit për të shuar zjarrin, ndërsa ekipet e urgjencës konstatuan vdekjen e viktimave.
Policia ka shoqëruar shoferin e kamionit dhe hetimet për zbardhjen e plotë të ngjarjes janë në vijim.