Edhe pse prej më shumë se 4 vitesh rezulton i zhdukur dhe ende i pagjetur, emri i Ervis Martinaj vazhdon të jetë pjesë e zhvillimeve mediatike dhe ligjore në Shqipëri.
Në një vendim të dhomës së këshillimit në Gjykata e Lartë e Shqipërisë, të marrë në mars të këtij viti, janë pasqyruar detaje të hetimeve që lidhen me akuzat ndaj tij, përfshirë mbajtjen e municioneve dhe përdorimin e uniformës së policisë pa të drejtë.
Sipas dokumenteve hetimore, gjatë një kontrolli të zhvilluar në maj të vitit 2022 në një hotel pranë Rinasit, policia nuk arriti ta gjente Martinajn në vendngjarje, por në dhomën ku ai dyshohej se kishte qëndruar u sekuestruan sende të ndryshme, përfshirë armë zjarri, municione, elementë të uniformës policore dhe mjete të tjera të dyshimta.
Në kuadër të hetimeve janë kryer ekspertime të ndryshme biologjike, daktiloskopike, balistike dhe kimike mbi provat e sekuestruara.
Një akt ekspertimi biologjik i përmendur në dosje raportohet se ka identifikuar një përputhje të profilit gjenetik nga disa mostra të marra, përfshirë edhe një furçë dhëmbësh të sekuestruar në hotel, me profilin e regjistruar në sistemet përkatëse.
Ndërkohë, çështja ka vijuar me hetime dhe marrje në pyetje të personave të lidhur me hotelin ku u zhvillua kontrolli, ndërsa Martinaj mbetet ende i pa gjetur.