Shtetet e Bashkuara kanë deklaruar se ambasada amerikane në Kiev do të vijojë të qëndrojë e hapur, pavarësisht paralajmërimeve të Rusisë se diplomatët dhe qytetarët e huaj në kryeqytetin ukrainas mund të jenë objektiv i sulmeve me raketa.
Në një deklaratë të publikuar në platformën X, ambasada amerikane hodhi poshtë raportimet për ndryshime në funksionimin e saj diplomatik në Ukrainë.
“Nuk ka pasur asnjë ndryshim në operacionet tona dhe çdo raport që thotë të kundërtën është i rremë. Departamenti i Shtetit nuk ka prioritet më të lartë se siguria e qytetarëve amerikanë dhe rishikon rregullisht masat e sigurisë në ambasadën në Kiev”, thuhet në deklaratë.
Paralajmërimi i Moskës erdhi nga Ministria e Jashtme ruse, e cila u bëri thirrje diplomatëve dhe shtetasve të huaj të largohen “sa më shpejt të jetë e mundur” nga Kievi, duke pretenduar se qyteti ndodhet përballë një rreziku të lartë sulmesh.
Sekretari amerikan i Shtetit, Marco Rubio, deklaroi se ministri i Jashtëm rus, Sergei Lavrov, e kishte paralajmëruar personalisht se Kievi “do të bëhet një vend shumë i rrezikshëm”. Rubio shtoi se personeli diplomatik amerikan është informuar për nivelin e rritur të kërcënimit, por pa konfirmuar ndonjë plan për evakuim të ambasadës.
Ndërkohë, sekretari i Këshillit të Sigurisë së Rusisë, Sergei Shoigu, e cilësoi paralajmërimin e Moskës si “shumë serioz”.
Në të njëjtën linjë me Uashingtonin janë pozicionuar edhe disa vende të Bashkimit Evropian, të cilat kanë refuzuar të tërheqin stafet diplomatike nga Kievi. Ambasadorja e BE-së në Ukrainë deklaroi se “Bashkimi Evropian nuk do të largohet nga këtu” dhe se përfaqësuesit europianë do të vazhdojnë të qëndrojnë në vend.
Po ashtu, Bashkimi Evropian thirri në Bruksel të ngarkuarën me punë të Rusisë, duke i kërkuar Moskës të ndalojë sulmet ndaj civilëve dhe të angazhohet në bisedime reale për paqe, duke nisur me një armëpushim të plotë dhe pa kushte.
Tensionet janë rritur ndjeshëm pas sulmeve të fundit ruse ndaj Kievit. Fundjavën e kaluar, Rusia lëshoi mbi 80 raketa drejt kryeqytetit ukrainas, ku sipas autoriteteve ukrainase humbën jetën të paktën dy persona dhe 87 të tjerë u plagosën.