Një lajm i trishtë ka prekur botën e artit dhe muzikës popullore shqiptare. Klarinetisti i njohur dhe artisti i dashur i jugut të vendit, Spiro Mastora, është ndarë nga jeta, duke lënë pas një trashëgimi të vyer artistike.
Lajmi u bë i ditur nga kryetari i Bashkisë së Gjirokastrës, Flamur Golemi, i cili shprehu dhimbjen për humbjen e një prej figurave më të respektuara të muzikës popullore shqiptare.
“Me hidhërim mora lajmin për ndarjen nga jeta të artistit popullor dhe klarinetistit të njohur Spiro Mastora. Anëtar i familjes së njohur të instrumentistëve virtuozë Mastora, ai la gjurmë të pashlyeshme në folklorin shqiptar përmes interpretimit të tij të jashtëzakonshëm të motiveve tradicionale. Kontributi i tij në artin dhe kulturën shqiptare do të mbetet i paharruar”, shprehet Golemi në reagimin e tij.
Spiro Mastora ishte një nga emrat më të spikatur të muzikës tradicionale në jug të Shqipërisë. Me interpretimet e tij në klarinetë dhe instrumente të tjera popullore, ai promovoi dhe ruajti me përkushtim meloditë karakteristike të Gjirokastrës, Dropullit dhe trevave përreth.
Gjatë karrierës së tij shumëvjeçare, ai u bë pjesë e aktiviteteve të shumta artistike, festivaleve folklorike dhe gëzimeve familjare, duke fituar respektin dhe admirimin e publikut brenda dhe jashtë vendit.
Talentit të tij i parapriu tradita familjare. Spiro Mastora trashëgoi dashurinë për muzikën nga i ati, Vasil Mastora, një muzikant i njohur që me violinën e tij u dha jetë për dekada dasmave, koncerteve dhe aktiviteteve kulturore në jug të vendit.
Ndarja nga jeta e Spiro Mastorës përbën një humbje të madhe për kulturën dhe folklorin shqiptar. Megjithatë, krijimtaria dhe interpretimet e tij do të vazhdojnë të jetojnë në kujtesën e artdashësve dhe brezave që do të trashëgojnë pasionin për muzikën tradicionale shqiptare.