Qindra qytetarë u mblodhën në qendër të Tiranës për të protestuar kundër dhunës së ushtruar ndaj protestuesve në Zvërnec gjatë fundjavës.
Tubimi nisi përpara Ministrisë së Brendshme dhe më pas u zhvendos para Kryeministrisë, ku pjesëmarrësit dënuan ashpër incidentet e ndodhura në Zvërnec. Sipas tyre, protestuesit u trajtuan me dhunë dhe u tërhoqën zvarrë nga punonjës të sigurisë private gjatë kundërshtimit të projektit të planifikuar në zonë.
Protestuesit kërkuan reagim dhe ndërhyrje nga institucionet shtetërore, ndërsa shprehën kundërshtimin e tyre ndaj ndërtimeve të parashikuara në Zvërnec.
Gjatë manifestimit u dëgjuan thirrje si: “Anuloni projektin”, “Shqipëria e shqiptarëve”, “Shqipëria nuk shitet” dhe “Duam dorëheqje”. Organizatorët dhe pjesëmarrësit theksuan se protesta ishte qytetare dhe e pavarur nga partitë politike.
Në fjalën e tij, aktivisti Taulant Binaj ngriti shqetësime lidhur me mbrojtjen e zonave natyrore në vend, duke argumentuar se shumë prej tyre po përballen me presione për zhvillime që, sipas tij, mund të dëmtojnë mjedisin.
“Shqipëria nuk ka marrë fund. Kjo është e njëjta Shqipëri për të cilën është luftuar dhe punuar ndër vite. Shumë nga zonat e mbrojtura që janë shpallur dhe ruajtur me përpjekje të mëdha po përballen me rrezikun e ndërhyrjeve që mund të ndryshojnë karakterin e tyre natyror,” deklaroi Binaj.
Ai shtoi se ndryshimet ligjore të viteve të fundit kanë krijuar, sipas tij, mundësi për zhvillime në territore të mbrojtura, duke e konsideruar këtë një sfidë të rëndësishme për ruajtjen e pasurive natyrore të vendit.
Protesta u zhvillua pa incidente dhe përfundoi me thirrje për transparencë, mbrojtje të mjedisit dhe respektim të interesit publik në vendimmarrjet që lidhen me zonat natyrore të Shqipërisë.