Trondit Hollywood-i, aktori i njohur gjendet i vdekur në banesë
Aktori amerikan James Handy, i njohur për rolet e tij në filma dhe seriale të suksesshme si “Top Gun: Maverick”, “Jumanji”, “Logan”, “Law & Order” dhe “Criminal Minds”, është gjetur i vdekur në banesën e tij në Los Angeles.
Sipas mediave ndërkombëtare, 81-vjeçari u gjet pa shenja jete në oborrin e shtëpisë së tij në zonën e Tarzanës, Kaliforni. Autoritetet njoftuan se ai kishte marrë plagë të shumta me thikë në kraharor.
Pas ngjarjes, policia arrestoi 44-vjeçarin Michael Gledhill, djalin e partneres së aktorit, i cili tashmë përballet me akuza për vrasje. Për të dyshuarin është caktuar një garanci prej 2 milionë dollarësh.
Sipas raportimeve, vetë i dyshuari ka telefonuar numrin e emergjencës 911, duke bërë deklarata që çuan në identifikimin dhe arrestimin e tij. Kur oficerët mbërritën në vendngjarje, ai u tha se ishte personi që kërkonin.
Hetimet paraprake tregojnë se i dyshuari jetonte në të njëjtën banesë me nënën e tij, e cila kishte një marrëdhënie me aktorin.
James Handy lindi në Nju Jork dhe ndërtoi një karrierë të gjatë në industrinë e filmit dhe televizionit. Ai debutoi në ekran në vitin 1977 me serialin “Ryan’s Hope” dhe gjatë dekadave të mëvonshme u bë pjesë e shumë produksioneve të njohura amerikane.
Paraqitja e tij e fundit në kinematografi ishte në filmin e suksesshëm “Top Gun: Maverick”, i publikuar në vitin 2022.
Vdekja e aktorit ka tronditur fansat dhe industrinë e argëtimit, ndërsa hetimet për zbardhjen e plotë të ngjarjes vazhdojnë.
