Tragjedi në Çikago: 7-vjeçarja humb jetën pas sulmit me thikë
Një ngjarje tragjike ka tronditur Çikagon, ku një vajzë shtatëvjeçare humbi jetën pasi u sulmua me thikë ndërsa po ecte në një rrugë të qytetit.
Sipas mediave amerikane, ngjarja ndodhi të shtunën, pak para mesditës, në Cottage Grove Avenue, në zonën e Chatham. Sipas policisë, e mitura po ecte në trotuar kur iu afrua një grua e rritur, e cila dyshohet se nxori një thikë dhe e goditi disa herë në shpinë.
Pas sulmit, dëshmitarët reaguan menjëherë. Disa kalimtarë ndoqën dhe ndaluan të dyshuarën, duke e mbajtur nën kontroll deri në mbërritjen e policisë.
Një dëshmitar tregoi se kishte parë gruan duke u larguar nga vendi i ngjarjes, kur një tjetër person bërtiti duke kërkuar që ajo të ndalohej, pasi dyshohej se kishte sulmuar fëmijën.
Shërbimet e emergjencës mbërritën në vendngjarje dhe vajza u transportua me urgjencë në një spital pediatrik. Pavarësisht përpjekjeve të mjekëve, ajo nuk mundi t’u mbijetonte plagëve të marra dhe ndërroi jetë pak pas mbërritjes në spital.
Edhe gruaja e dyshuar për sulmin u dërgua në spital, pasi u plagos gjatë momentit kur u ndalua nga qytetarët. Sipas autoriteteve, plagët e saj nuk paraqisnin rrezik për jetën.
Pas trajtimit mjekësor, ajo u vu në ndalim nga policia. Identiteti i saj nuk është bërë ende publik.
Autoritetet kanë nisur hetimet për të zbardhur rrethanat e ngjarjes. Deri tani nuk dihet nëse e dyshuara e njihte viktimën apo cili ka qenë motivi i sulmit.
Këshilltarja bashkiake e distriktit të 8-të të Çikagos, Michelle Harris, shprehu tronditjen për ngjarjen dhe ngushëllimet për familjen e vajzës. Ajo vlerësoi gjithashtu ndërhyrjen e qytetarëve që ndaluan të dyshuarën.
Policia e Çikagos vijon hetimet dhe u ka bërë thirrje personave që kanë dijeni për ngjarjen apo kanë qenë dëshmitarë të saj që të kontaktojnë autoritetet.